सुदूरपश्चिमका मुख्यमन्त्री सोडारीलाई तत्काल राजीनामा दिन तीन दलको आग्रह

राष्ट्रिय

गृहपृष्ठ
राष्ट्रिय
सुदूरपश्चिमका मुख्यमन्त्री सोडारीलाई तत्काल राजीनामा दिन तीन दलको आग्रह

सुदूरपश्चिमका मुख्यमन्त्री सोडारीलाई तत्काल राजीनामा दिन तीन दलको आग्रह

आइतबार, असार ३१, २०८१ सुर्या दैनिक न्यूज डेस्क

धनगढी । सुदूरपश्चिमका तीन राजनीतिक दलहरुले अल्पमतामा परेका मुख्यमन्त्री दीर्घबहादुर सोडारीलाई तत्काल राजीनामा दिन आग्रह गरेका छन् । नेपाली कांग्रेस, नेकपा एमाले र नागरिक उन्मुक्ति पार्टीले आज धनगढीमा संयुक्त पत्रकार सम्मेलन गरी मुख्यमन्त्री अल्पमतमा परिसक्नुभएको र विश्वासको मत लिन खोजे पनि पाउने अवस्था नरहेकाले यथाशीघ्र राजीनमा दिन आग्रह गरेका हुन् ।
पत्रकार सम्मेलनमा कांग्रेस संसदीय दलका नेता कमलबहादुर शाहले बजेट समेत पास नभएको अवस्थामा मुख्यमन्त्रीले छिटो राजीनामा दिँदा नयाँ सरकार गठन गर्न र बजेट ल्याउन सहज हुने बताउनुभयो । केन्द्रमा समेत प्रधानमन्त्रीले विश्वासको मत गुमाइसकेकाले प्रदेशमा पद ओगटेर बस्नु अब उचित नहुने उहाँको भनाइ छ ।
पत्रकार सम्मेलनमा एमाले संसदीय दलका उपनेता सन्तोष थापा शर्मा, नागरिक उन्मुक्ति पार्टीका संसदीय दलका नेता धनश्याम चौधरीले पनि मुख्यमन्त्रीलाई मार्ग प्रसस्त गर्न आग्रह गर्नुभयो । सुदूरपश्चिममा कांग्रेस नेतृत्वमा एमाले, नागरीक उन्मुक्तिलाई समेटेर सरकार बनाउने तयारी छ ।
५३ सदस्यीय प्रदेशसभामा सरकार गठनका लागी २७ प्रदेशसभाको सर्मथन चाहिन्छ । नयाँ गठबन्धनमा कांग्रेसका १८, एमालेका ११ र नागरीक उन्मक्तिका ७ गरी ३६ जना छन् । बजेट अहिलेसम्म पास नभएकाले अध्यादेशबाट बजेट ल्याउने नयाँ गठवन्धनको तयारी छ । मुख्यमन्त्री सोडारीले भने ३० दिनभित्र विश्वासको मत लिनुपर्ने संवैधानिक व्यवस्था भएकाले तत्काल राजीनामा नदिने र सभाबाट विश्वासको मत लिने बताएका छन् ।

प्रकाशित मिति: आइतबार, असार ३१, २०८१ ०६:४७

प्रतिक्रिया दिनुहोस्