वीरगञ्ज : वीरगञ्ज महानगर क्षेत्रमा चापाकल सुकेर खानेपानीको चर्को अभाव हुन थालेपछि सर्वसाधारणले खानेपानीको लाइन जडान गर्न थालेका छन्। चालु आर्थिक वर्षको साउनदेखि असार ६ गतेसम्मको अवधिमा मात्र थप २८१० घरधुरीले खानेपानी संस्थान शाखा कार्यालयबाट नयाँ धारा जडान गरेका छन्।
खानेपानी संस्थान शाखा कार्यालय वीरगञ्जका वितरण प्रमुख सञ्जीवकुमार यादवले सर्वसाधारणको घरआँगन परिसरमा जोडिएको चापाकल सुकेसँगै खानेपानी संस्थानको धारा जोड्ने क्रम ह्वात्तै बढेको जानकारी दिए। पहिला वीरगञ्जवासीले संस्थानको धारा जडानमा खासै रुचि देखाउँदैनथे तर अहिले घरमा गाडिएको चापाकलमा पानी आउन छाडेसँगै संस्थानको धारा जडान गर्न भन्दै आउने गरेका छन्, उनले भने।
ग्राहक सङ्ख्यामा वृद्धि ?
वितरण प्रमुख यादवका अनुसार गत आवको असार मसान्तसम्म संस्थानका खानेपानीका ग्राहक ८४०० मात्रै रहेका थिए। तर यो हिउँदेयाममा चर्को खडेरी लागेसँगै खानेपानी संस्थानको लाइन जोड्नेको सङ्ख्या बढिरहेको छ। विसं २०८१ असार ६ गतेसम्म संस्थानका खानेपानीका कूल ग्राहक सङ्ख्या ११२१० पुगेको छ। संस्थानले वीरगञ्ज महानगरभित्र २८५ सार्वजनिक धारामार्फत खानेपानी पनि उपलब्ध गराउँदै आइरहेको छ।
प्वाल पारेर पानी चोरी ?
खानेपानी संस्थान शाखा कार्यालयले वीरगञ्जको छपकैयाँ क्षेत्रमा अवैध ढङ्गले खानेपानीको पाइपमा प्वाल पारेर खानेपानीको चुहावट भइरहेको नियन्त्रणका लागि जिल्ला प्रशासन कार्यालयसँग सहयोग मागेको छ। वीरगञ्जको छपकैयाँ क्षेत्रमा सर्वसाधारणले खानेपानीको पाइपलाई क्षति पुर्याएर खानेपानी चोरी गरिरहेका छन्, शाखा प्रबन्धक मन्दिप श्रेष्ठले भने, खानेपानीको चोरी नियन्त्रण गर्नका लागि आवश्यक सहयोग गरिदिन अनुरोध गर्दछु। सो क्षेत्रमा २०० भन्दा धेरै घरधुरीले खानेपानीको अवैध रूपमा प्रयोग गर्दै आइरहेका छन्।
भूमिगत पानीको समस्या ?
वितरण प्रमुख यादवका अनुसार चुरे क्षेत्रको विनाशकै कारणले पनि वीरगञ्ज आसपास क्षेत्रको भूमिगत पानीको सतह घट्दै गइरहेकाले खानेपानीको समस्या देखिएको हो। कार्यालयका अनुसार वीरगञ्ज क्षेत्रको खानेपानीको मुख्य स्रोत नै भूमिगत पानी हो। अन्य पहाडी जिल्लामा जस्तो यहाँ कुनै नदीबाट पानी ल्याएर वितरण गर्न सक्ने अवस्था छैन।
क्षमता र समस्या ?
खानेपानी संस्थानसँग दैनिक १ करोड ६८ लाख लिटर खानेपानी उत्पादन गर्ने क्षमता रहेको छ। सो क्षमतामध्ये अहिले वीरगञ्ज महानगर क्षेत्रमा १ करोड १५ लाख ५० हजार लिटर पानीको दैनिक माग रहेको छ तर कूल उत्पादन क्षमता भने ४० प्रतिशत खानेपानी चोरी तथा चुहावट हुने गरेको छ।
कार्यालयसँग सानारठुला गरेर डेढ दर्जन खानेपानीका बोरिङ रहेका छन्। तीमध्ये ११ भूमिगतबाट पानी तान्ने ठुला प्रकृतिका बोरिङ रहेका छन्। कार्यालयसँग कम्तीमा पनि वीरगञ्जका २०००० घरधुरीलाई खानेपानी खुवाउन सक्ने क्षमता छ तर अहिले पूर्वाधार र बजेट अभावका कारणले सकिरहेको छैन। वितरण प्रमुख यादवले बजेट अभावकै कारणले चाहे जति खानेपानीको पाइपलाइन विस्तार गर्न नसकिरहेको बताए।
